ନୂଆଦିଲ୍ଲୀ,୨୪।୭: ମନି ଲଣ୍ଡରିଂ ମାମଲାରେ ଅଡୁଆରେ ରିଲାଏନ୍ସ ଗ୍ରୁପର ଚେୟାରମ୍ୟାନ୍ ଅନିଲ ଅମ୍ବାନୀ। ଦିଲ୍ଲୀ ଓ ମୁମ୍ବାଇରେ ୩୫ଟିରୁ ଅଧିକ ସ୍ଥାନରେ ପ୍ରବର୍ତ୍ତନ ନିର୍ଦେଶାଳୟ ବା ଇଡି ପକ୍ଷରୁ ହୋଇଛି ଚଢାଉ। ପ୍ରିଭେନସ୍ ଅଫ୍ ମନି ଲଣ୍ଡରିଂ ଆକ୍ଟ ଅନୁସାରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। ଏହି କାର୍ଯ୍ୟାନୁଷ୍ଠାନ ନ୍ୟାସନାଲ ହାଉସିଂ ବ୍ୟାଙ୍କ, ସେବି, ନ୍ୟାସନାଲ ଫାଇନାନ୍ସିଆଲ ରିପୋର୍ଟିଂ ଅଥରିଟି, ବ୍ୟାଙ୍କ ଅଫ୍ ବରୋଦା ଓ ସିବିଆଇର ଦୁଇଟି ଏଫଆଇଆର ଆଧାରରେ ହୋଇଛି। ଅନିଲ ଅମ୍ବାନୀଙ୍କ ବହୁ ଠିକଣାରେ ତଲାସୀ କରାଯାଉଛି। ଇଡି ଯାଞ୍ଚରେ ଏହି କଥାର ପ୍ରମାଣ ମିଳିଛି ଯେ, ଜନସାଧାରଣଙ୍କ ପାଣ୍ଠିର ଅପବ୍ୟବହାର ପାଇଁ ଷଡଯନ୍ତ୍ର ହୋଇଥିଲା। ଏଥିରେ ବହୁ ସଂସ୍ଥା, ବ୍ୟାଙ୍କ, ସେୟାର ହୋଲ୍ଡର ଓ ନିବେଶକଙ୍କୁ ଠକାଯାଇଛି। ଲାଞ୍ଚ ନିଆଯାଇଥିବା ଦିଗରୁ ମଧ୍ୟ ତଦନ୍ତ କରାଯାଉଛି, ଯେଉଁଥିରେ ୟେସ ବ୍ୟାଙ୍କର ପ୍ରମୋଟର୍ସଙ୍କ ଭୂମିକା ମଧ୍ୟ ସନ୍ଦେହସ୍ପଦ ରହିଛି।
୨୦୧୭ ରୁ ୨୦୧୯ ମଧ୍ୟରେ ୟେସ୍ ବ୍ୟାଙ୍କରୁ ନିଆଯାଇଥିବା ପ୍ରାୟ ୩ ହଜାର କୋଟି ଟଙ୍କାର ଋଣକୁ ବେଆଇନ ଭାବରେ ଦୂରୁପଯୋଗ ହୋଇଥିବା ସନ୍ଦେହ କରାଯାଇଛି। ଏହା ପୂର୍ବରୁ ଷ୍ଟେଟ୍ ବ୍ୟାଙ୍କ ଅଫ୍ ଇଣ୍ଡିଆ ଅନିଲ ଅମ୍ବାନୀଙ୍କୁ ଫ୍ରଡ୍ ଘୋଷିତ କରିଥିଲା। ଚଳିତ ମାସ ଆରମ୍ଭରୁ ଅନିଲଙ୍କ କମ୍ପାନୀ ରିଲାୟନ୍ସ କମ୍ୟୁନିକେସନର ଲୋନ୍ ଆକାଉଣ୍ଟକୁ ଏସ୍ବିଆଇରୁ ମିଳିଥିଲା ବଡ଼ ଝଟକା। ଏସ୍ବିଆଇ କମ୍ପାନୀକୁ ଡିସେମ୍ବର ୨୦୨୩, ମାର୍ଚ୍ଚ ୨୦୨୪ ଓ ସେପ୍ଟେମ୍ବର ୨୦୨୪ ରେ କାରଣ ଦର୍ଶାଅ ନୋଟିସ୍ ପଠାଇଥିଲା। କମ୍ପାନୀର ଉତ୍ତରର ସମୀକ୍ଷା କରିବା ପରେ ବ୍ୟାଙ୍କ କହିଥିଲା ଅନିଲଙ୍କ କମ୍ପାନୀ ଲୋନ୍ ନେବାର ସର୍ତ୍ତ ପାଳନ କରି ନାହିଁ। ଏହାସହ କମ୍ପାନୀ ନିଜ ଆକାଉଣ୍ଟର ପରିଚାଳନାରେ ଅନିୟମିତତାର ପୁରା ସୂଚନା ଦେଇ ନାହିଁ।
